پاکستان کے تاریخی اور ثقافتی ورثے کے تحفظ کے سلسلے میں ایک بڑی کامیابی حاصل ہوئی ہے جہاں امریکی حکومت نے مختلف ادوار میں پاکستان سے اسمگل کیے جانے والے 450 سے زائد نایاب تاریخی نوادرات باضابطہ طور پر حکومت پاکستان کے حوالے کر دیے ہیں۔
ان نوادرات کا تعلق قدیم گندھارا تہذیب، مہر گڑھ اور وادی سندھ کی ہزاروں سال پرانی تہذیبوں سے ہے۔ ان میں بدھ مت کے مجسمے، پتھر کے کندہ شدہ کتبے، مٹی کے قدیم برتن اور مہریں شامل ہیں جن کی بین الاقوامی مارکیٹ میں مالیت کروڑوں ڈالر بنتی ہے۔
امریکی حکام نے یہ نوادرات نیویارک اور دیگر شہروں میں آرٹ اسمگلروں اور غیر قانونی ڈیلرز کے خلاف کارروائیوں کے دوران برآمد کیے۔ واشنگٹن میں پاکستانی سفارت خانے میں ان نوادرات کی باقاعدہ حوالگی کی تقریب منعقد ہوئی۔
پاکستانی حکام نے امریکی اداروں کا شکریہ ادا کرتے ہوئے کہا ہے کہ ان نوادرات کو اسلام آباد کے قومی عجائب گھر میں رکھا جائے گا تاکہ آنے والی نسلیں اپنے شاندار تاریخی ورثے سے روشناس ہو سکیں۔